Events Calendar
KOTA SAMARAHAN: Raban penulis bup ‘Sejarah Malaysia Ranger’ bisi ngatur aum begulai enggau dua pengelicha Unimas iya nya Prof Dr Nelson Ilan enggau Dr Regina Garai kena 6 Ogos tu tadi.
Tuju aum nya diatur dikena nyerenih pekara bekaul enggau karang sereta buah penemu ke patut dibantai ungkup bup pasal Sejara Malaysia Renjer nya.
“Tu kedua kali kami udah baum. Tuju aum tu berandauka pekara bekaul enggau tusun atur ngaduka manuskrip bup sebedau iya ulih dichelak,” ku iya Presiden Gerempung Veteran Soldadu Kor Renjer (PVTKR) Lt Kol (B) Mohd Melintang Abdullah.
Nangkan nya, Melintang madah asil aum sehari nya isi karang bup nya jemah deka dibagi ngagai empat bagi. Bagi keterubah, nyerita sentang pemuka bup, bagi kedua pasal jalai pengidup, bagi ketiga pengawa udah pinchin, lalu kepenudi pasal simpul bup.
Tandu Melintang bup tu digaga asil buah runding kaban kaban PVTKR bekerejasama enggau piak Unimas. Bup tu jemah disadang tembu Mac tauka April taun baru (2021).
Sama bisi ngulu aum tu Penyanding Penemu Lt Jen (B) Datuk Stephen Mundaw, Lt Kol (B) Linus Lunsong Janti, Lt Kol (B) Fabian Wong sereta Lt Kol (B) Anwar Bashakan.
Sumber: Suara Sarawak, 9/8/2020
